Kveldsmesse i Herøy med Kvamsøybesøk
Kveldsmessa i Herøy kyrkje komande søndag får storbesøk frå Kvamsøya. Kari Ristesund er samtalegjest og ho har med seg blåsekvartetten ”Storblåsarane”
Kari Ristesund er folkehelseforkjemparen, kulturarbeidaren, eldreaktivisten, politikaren, reiseleiaren m.m. som kom til Kvamsøya for over 50 år sidan. Ho har fått kongens fortenestemedalje, ho har fått Sande kommune sin kulturpris og ho har fått Nasjonalforeningen for folkehelse sitt heidersmerke. Ho vaks opp som prestedotter i Oslo, på Harøya i Romsdal og i Stangvik på Nordmøre. Så gifta ho seg til Ristesund på Kvamsøya på 60-talet, og i dag er ho enke, mor og bestemor. Søndag fortel ho om engasjementet sitt, om livet sitt og om kven ho eigentleg er i samtale med Jens Terje Johnsen.
”Storblåsarane” er fire messingblåsarar frå Kvamsøya som i mange år har gledd folk i Sande med flott musikk. Søndag stiller dei i Herøy kyrkje med både salmemelodiar og andre melodiar. Dei som er med i gruppa no er John Ristesund, Johs Kvamme, Bjørn Støylen og Magne Støylen.
Gunnar Sævik er kveldsmessevert, Bjørn Leinebø er liturg og Atle Hovden Havåg sit ved orgelet.
