Erling Rimehaug er gjest i kveldsmessa i Herøy kyrkje komande søndag. Svært få kjenner kristenlivet i Norge betre enn Rimehaug. Han har i ei årrekkje arbeidd som journalist og redaktør i avisa Vårt Land, han har gitt ut ei rekkje bøker, og er svært respektert som kommentator i forhold til kva som rører seg i Kristen-Norge. Han er utdanna historikar og har m.a. markert seg med omfattande kunnskapar om dei politiske og religiøse forholda i Midt-Austen. I Herøy kyrkje søndag vil han snakke om kristenlivet som vandring, med utgangspunkt i boka si ”Tørsten gir lys” som kom ut i 2007. Samtalen vert leia av Rikke Kopperstad. Musikalske gjester i kveldsmessa er Ida Ankile og Andreas Gunvordal Johnsen. Dei syng og spelar i lag, som oftast kjende salmar i personleg stil. Ida er student og Andreas, oppvaksen i Fosnavåg, er lærar. Dei er busette i Volda.. Beathe Myklebust leier kveldsmessa, Bjørn Leinebø er liturg og Dag Johan Flattun sit ved orgelet. Før kveldsmessa er det salmeøving, og etterpå er det kyrkjekaffi på torget.